ای حسینه آغلیانار، آغلیون ئوز حالوزا

ایندی آغلیر کربلا شاهی سیزون احوالوزا

رادمردان خدا ئولمز همیشه زنده دور

سیز ئولوبسوز باخمیون بوجارو بوجنجالوزا

امت بی غیرتی نیلر امام تشنه لب؟

احتیاجی یوخ سیزون بیر قطره اشگ آلوزا

آغلاماخ وئرمز نتیجه، عزت دین اولماسا

یا گولون یا آغلیون یا کول یاخون سقالوزا

شمردن آرتیق حسینه سیز اذیت ایله دیز

ای خلاف شرع ادنلر! بیر باخون اعمالوزا

شمر بیردفعه حسینی ئولدوروب، مین دفعه سیز

ئولدوررسوز، گردوشه ایندی سیزون چنگالوزا

خامس آل عبانین بولمه دوز مقصودینی

ایسته دی بلکه وئره رونق سیزون اجلالوزا

خلقی شیطان تولایاندا، تولوسوز شیطانی سیز

مات و حیران قالمیشام بوشیوه اغفالوزا

واردی بیرعده حسینچی پاکدامن بی ریا

نه سیزه بنزر اولار، نه سیزلرون امثالوزا

شعر: حمید کرمی (ارجقی)